فضيحة فى محطات البنزين جديدة عنا !!
فضيحة فى محطات البنزين جديدة عنا !!
مشكلة حصلت قدامى فى محطة البنزين ... طلعت منها بمعلومه غريبة !! أول مره أعرفها !!
قولت لازم تعرفوها .. و طبعاً قصدى خير 😊
_ لقيت العمال اللى بيغسلوا العربيات طالعين من مكتب مدير المحطه زعلانين وبيزعقوا مع بعض ..
مااهتمتش أعرف إيه المشكلة _غير لما لقيت حد منهم بيتكلم وهو "بيبكى " فعلياً !!!
" نجيب منين طيب حسبي الله ونعم الوكيل " ! !!
حاولت أعرف إيه المشكلة من الشاب اللى بتعامل معاه دايماً "خريج تربية رياضية " ...
قالى بالحرف ... مدير المحطه عايز يزود الفلوس اللى بندفعهاله وإلا نمشى !!
تدفعله فلوس إزاى يعنى ؟!!!! هو إنتوا بتقبضوا منه ولا بتدفعوله ؟!!!
قالى : لا إحنا اللى بندفع علشان نقعد هنا !!!
كل واحد فينا بيدفع كل أسبوع ١٠جنى يعنى ٤٠ فى الشهر .. علشان يشغلنا عنده ..
قولتله طيب ومرتبكم ؟!
قالى ملناش مرتب طبعاً ... إحنا اللى بندفعلهم علشان يشغولنا هنا ...
ومرتبنا يعتبر "البقشيش " اللى بناخده منكم !!!
ودلوقتى هو عايزنا ندفع ٢٥ جنى فى الإسبوع يعنى ١٠٠فى الشهر !!!!
قولتله : طيب الكلام ده فى كل المحطات ؟!!!
قالى : غالباً بيكون فى المحطات الكبيره أكتر من الصغيره .
طبعًا كلامه أكده صوت زمايله كلهم وهم بيتعاركوا مع الريس بتاعهم !!
_ الشاهد فى كل القصه اللى فوق دى ....
إن حضرتك .. بتروح تغسل عربيتك بتدفع ٤٠ مثلاً غسيل بره وجوه وتاخد رقم وتديه لواحد من الشباب دول ....
يغسلك العربيه وتطلع عين أهله وهو بيشفطلك التراب منها ...
ويا سلام لو كان فى الشتا و هدومه كلها غرقانه مايه فى عز التلج !
وفى اﻵخر تاخد عربيتك وتمشى وانت فاكر إنه أخد نسبه من فلوس الغسيل أو بياخد مرتب على كده !!!!!
* لو كنت متعرفش ومن الكلام اللى فوق دا عرفت الحقيقة الحمد لله إنت عرفت دلوقتى ... هتعمل إيه ؟!!!
ولو عارف وعامل نفسك متعرفش ... بالله عليك متبخلش على الناس دى ..
الـ٥جنى مش هتفرق معاك لو حطتهاله فى جيبه .....
بس هتفرق معاه والله ...
_ "بقول الكلام دا ... ﻷنى شوفت بعينى ٣ ورا بعض استلموا عربياتهم ومشيوا والله من غير ما يطلعوا ولا مليم !
المحطه هتلاقى فيها الشاب والكبير والصغير ... خريجيين جامعات وجهله مابيفكوش الخط !! وطلاب ثانويه !!!
و الكل بيدفعوا "أتاوه " علشان يوصلولك إنت تديهم جزء من مرتبهم !!
الناس دول فاتحين بيوت ومسؤليين من أسرة كامله _ ومطلوب منهم كمان كل شهر يدفعوا المبلغ دا للمحطه !
والله العظيم من خلال تعاملى مع بعض من الناس دى ... عرفت إنهم المفروض يعملولهم إعلانات تبرعات زي مستشفى ٥٧٣٥٧ أو مستشفى مجدى يعقوب !!
بس للأسف بلدنا وإعلامنا النزيه مبيشوفوش غير اللى عاوزين يشوفوه بس !!!
_الناس دول مسؤلين مننا يا جماعه والله ..
_ أعطوا الأجير أجره قبل أن يجف عرقه" ..
_ ولو فى نظرك مش أجير ....
( " من نفس عن مؤمن كربة من كرب الدنيا نفس الله عنه كربة من كرب يوم القيامة " )
_________________
أخيراً كام ملحوظه مهمه ..
١: ( أول مره أطلب منكم شير ) ... الدال على الخير كفاعله ... 😘 😊
٢: ( الناس اللى واقفين على تنك البنزين وبيفولوا للعربيات ) معرفش عنهم أى معلومه ولا أعرف إذا كان ليهم مرتب ولا زى التانيين ... ✋
٣ : صورة المحطة دى 👇 .. محطة فى الإبراهيميه على البحر ( ليس لها أى علاقه بالقصه اللى فوق 👆 ) ...
صورتها فقط للفت الإنتباه ليس إلا .... (مرضتش أصور المحطه اللى حصلت فيها الحكايه دى علشان صاحب المحطه ممكن يتقمص ) 😉
٤ وأخيراً : عذراً على الإطالة .. أسعدكم الله فى الدارين و أغناكم بحلاله عن حرامه .. وكفاكم بفضله عمن سواه ..
... دُمتم فى رعاية الله ... 😊
By..nermin mohammed
تعليقات